Ori (2017 metro)

SARRERA

Ori mendiak bi mila metro ditu eta ez da mendebalderago altuera horretako kaskorik Pirinioetan. Ikusgarria da, lerden-lerdena, Zaraitzuko iparraldean. 

Gailurra doi-doi ordubetera dago oinez Larrauko gainean dagoen aparkalekutik eta, kasko hartatik, arrunt ikuspegi zoragarriak daude Iratiko oihanerantz eta inguruko gailurretarantz. Are gehiago, zerua oskarbi badago, Moncayo mendia eta Kantauri itsasoa ere ikusiko dituzu. 

GURE BIDEA

Denbora askorik ez dugunez, Larrauko gainetik igotzea erabaki dugu. Berau da Oriko tontorrera doan biderik errazena eta motzena. 

DESKRIBAPENA

10:00 Zurizako kanpina. Traste guztiak kotxean sartu eta Larrauko gaineraino bidaituko dugu.

Alanoak

11:10 Larrauko gaina. Motxila bizkarrean hartu eta goruntz abiatzen gara.

Gorriz igoerako bidea. Malda handiago dauka, baina ez du inungo zailtasun ez arriskurik. Urdinez, beherako bidea.

Lainoen itsasoa

12:10 Ori. gaur ere, eguraldiarekin zortea daukagu eta ikuspegi izugarria dugu begien aurrean. 

Panoa pirineoei begira: Hiru Erregeen Mahaia, Sobarkal, Auñamendi, Ezkaurre, Quimboa Alto, Petraficha...

Panoa etxeruntz begira

Txindoki bera ere ikusi daiteke

Tontorrean!

Pantxo ere iritsi da!

12:30 Beheruntz goaz. Jeitsierakak ez du inolako galerarik, bidea jarraitzea besterik ez da.

13:00 Larrauko gaina. Mendi erraz eta azkarra. Baina hala ere edertasunez betea. Ikuspegi zoragarriak eskeini dizkiguna!

Hiru Erregeen Mahaia (2444 metro)

Afari batean, Oscar lagunak, Hiru Erregen Mahaia mendia aspalditik buruan zeukala esan zidan. Betidanik izan zuela mendi honen tontorra zapaltzeko gogoa. Egia da, Euskal Herriko mendirik garaienak baduela bere xarma berezia. Irailaren 14an jarri genuen zita, hain zuzen goizeko 8:00etan.

GURE BIDEA

Mendi hau igotzeko bide normalena, Linzako aterpetxetik doana da. Linzako gaina igaro eta Solanako gainera iritsi behar dugularik. Ondoren harrizko lapiaza pasa eta mendiaren azken maldei eraso beharko diegu. 

Igoera eta jeitsiera bide beretik eginen ditugu.

DESKRIBAPENA

9:40 Linzako aterpetxea. Bertan kotxea utzi, traste guztiak prestatu eta goruntz irten ginen. 

Oscar atzean Acherito eta Sobarkal dituelarik

10:00 Linzako lepoa

Gorriz gure bidea. Berdez Sobarkalera doana. Eskubian Chinebral

Argazki hontan, Linzako lepotik Solanako lepora doan bidea gorriz azaltzen da, guk egin beharreko bidea. Berdez ordea, ekainean Sobarkal igotzeko jarraitutako bidea jarri dut.

10:45 Solanako lepoa. Bertatik ikusi ahal izango dugu lehen aldiz gaurko helburua. Inguruko mendien ikuspegia ere ederra da benetan. 

Atzean dugun ikuspegia

Oscar haizearekin borrokan

Zutabe honetan jartzen dituen denborak, nahiko malguak dira

11:18 Harrizko lapiaza. Bertan bidea ondo asmatzea beharrezkoa da. Mugarri ugari daude, beraz beraiei jarraitzea da hoberena.  

Paisai ederra: Barazea, Lapazarra, Keleta, Ori...

12:25 Hiru Erregeen Mahaiako lepoa. Bertatik gora azken txanpa besterik etzaigu geratzen. Hemendik Auñamendi mendia eta Añelarra mendien ikuspegia ezinhobea da.

Gorriz igoera; urdinez jeitsiera

12:40 Hiru Erregeen Mahaia. Ikuspegi zoragarria. Egun ederra! Hamaiketako latza!

Biok tontorrean!

Oscar tontorrean!

Xabierko gazteluaren miniatura

Xabierko Frantziskoren miniatura bere "pañuelikoarekin"

Tontorreko panoa

13:25 Beherako bidea. Berriz ere lepora jetsi beharra dugu lehenik, eta ondoren igoeran eginiko bidea pixkanaka pixkanaka kontrako zentzuan egin.

Izotza ere aurkitu genuen beherakoan

Sarrioek ere egin ziguten bisita

Lapiaza berriz igarotzen

Linza (1h 35'), guk ordu betean jeitsi genuen

Solanako lepoan berriz haizetea

Zelaia ureztatzen!

15:30 Linzako aterpetxea. 6 orduko mendi irteera ederra. Egun zoragarriaz gozatzeko aukera izan dugularik gainera.

Orain Zurizan gaua pasa eta bihar Ori mendiari bisita.

Aiztondo, Iñaki Goñi bidea, 115 metro. 5c (5a behartuta)

Deskribapena eta bi krokisak Xabier Larretxearen Eskalatzen blogetik hartuak daude.

Duela egun gutxi, Iruñako nire lagun Fernandok deitu zidan, Norbegiara itzultzeko hegazkina erosi zuela esanez, eta adio esateko paretaren batean agurtu beharko ginela esan zidan. Beraz, larunbaterako egin genuen zita. Nafarroako Uharte herrian, Aiztondoko pareta ederrean, Iñaki Goñi bidea egitea erabaki genuen. Disfrutatzeko bide horietako bat!

BIDEAREN DATUAK

Materiala: 14 zinta (guk 13 behar izan genituen) + bilgunetarako materiala. Friend eta fisureroak soberan daude.

Arroka: Kareharria

Orientazioa: Hegoa

Garaia: Urte osoa.

Iraupena: 2h.

Berrekipamendua: FNDME-ko Ekipamenduen Batzordeak berrekipatua. 

Harri trinkoa duen eta begetazio gabeko bidea. Oso ongi ekipatua. Aiztondon gehien errepikatzen den bidea izango da seguruenik. Inguru honetako beste bideetan bezala arroka berehala lehortzen da eta beraz, urte osoan eskala daiteke. 

Iristeko: Irurtzun edo Altsasutik Uharte Arakil herrira hurbildu A-15 autobidea erabiliz. Herria zeharkatu eta Irañetako norabidea hartu (NA-2410). Errekaren ondoan dagoen aisia-leku bat igaro ondoren ezkerrera doan pista bat hartu. Pista honek Uharte Arakil udalak eskalatzaileentzat eginiko parkingera eramango gaitu berehala (poste batekin adierazita dago).

Hurbiltzeko: Pareta dagoen aldera abiatu. Berehala bidezidor bat aurkituko dugu. Jarraitu eta 10 minututan bidearen oinean gara.

BIDEAREN KROKISA

DESKRIBAPENA

Eginiko bidea gorriz

L1 (30 m, 9 aseguru, 4c/5a): Plaka etzana. Gero eskuinera jotzen du eta berriro zuzen bilguneraino. Bigarren aseguruaren parean bidearen izena idatzita duen plaka metaliko bat dago.

Fernando lehen luzearen hasieran. Lehen bilgunetik ateratako argazkia

Fernando, lehen bilgunean.

L2 (30 m, 10 aseguru, 5b+/5c): Eskuineko parabolt lerroa hartu. Plaka etzana. Laugarren asegurutik eskuinera pasa. Eskuinean dagoen pitzadura batez lagunduta kanal modukoan sartu. Tarte honetan eskuekin baino oinekin eskalatzen da. Bilgunea eskuineko plakan dago ipuru baten parean. Ez nahastu goian, kanal barruan,  ikusten den bilgunearekin.

Bigarren luze erdian

Bigarren bilgunera iristen

Bigarren bilgunean, nahiko deserosoa

L3 (30 m, 14 aseguru, 5c): Plaka etzana hasieran, baina gero bertikalagoa bihurtzen da. Sabairaino zuzen igo eta bere ezker aldetik igaro. Sabaitik irten eta azken plaka bat igo bilgunera iristeko.

Fernando, hirugarrengo luzean

Kamarari begirada bat botatzen

Beheko lagunak dagoeneko nahiko behean

Aurrera egiten

Bideari gradua ematen dion pausuan

Ezkerraldetik pasa behar da, apur bat "extraplomatua" da

L4 (25 m, 9 aseguru, 4b): Plakatxo oso etzana hasieran. Pitzadura-kanal bat zeharkatu eta beste plaka bat apur bat bertikalagoa, azken bilgunera iristeko.  

Azken luzean sartuta

Azken bilera, rapelatzeko prestatua dago

Goitik ateratako panoa

Jaitsiera: Bi aukera daude. Lehena atzetik oinez jaistea da. Bidezidor batean arrastoak jarraituz 20 minututan bidearen oinean gaude. Aukera azkarrena eta seguruena da. Bigarren aukera bidetik rapelatzea da.

Fernando lehenengo rapelean

Soka zuhaixkatik ateratzen

Ni, bigarrengo rapelean

Beheruntz

Soka eta materiala jaso, ur trago bat edan eta Uhartera jeitsi ginen garagardotxo bat hartzera. Egun ederra pasa genuen. Hurrenarte Fernando!