2012/07/14

Panticosa - Respomuso - Panticosa


Uztaileko lehen bi asteak trabesiatxo bat prestatzen ibili ondoren, azkenean Panticosa inguruan asteburu pasa bat egingo genuela erabaki genuen. Gainera, horrela, Bachimañako aterpe berria (jakin ezkero zenbat jende egongo zen, ziurrenik ez ginen joango) bere irekiera egunean ikusi ahal izango genuen.

GURE BIDEA

Lehen eguna

Panticosako "Casa de Piedra" aterpetik irten eta GR-11 jarraituz Bachimañako aterpe berrira joango gara. Bachimañako ibona igarota eta Ibon Urdinetarako bidea ezkerrean utzita, Puerto de Marcadau edo Puerto de Panticosa deritzon gainera bideratuko gara frantziako lurretan sartzeko. Wallon aterpera doan bidea jarraituko dugu eta ahal denean, ezkerreruntz irteten den bide batetik, Gran Fachako gainera iritsiko gara. Indarrak laguntzen bagaitu, tontorra egiten sahiatuko gara. Azkenik Respomusoko aterpera doan bidea hartuko dugu Campoplanoko ibonera iristeko. Bertan egingo dugu gaua. (15,8km)

Bigarren eguna

Campoplanoko ibonetik irten eta GR-11 hartuko dugu berriz, Tebarrayko gainera igoko gara. Bertatik Infernuko gainera igaro eta Ibon Urdinetatik behera abiatuko gara Bachimañako ibonetara iritsi arte. Hemendik aurrera, lehen eguneko bidea desegitea besterik etzaigu geratuko, Bachimañako aterpetik pasa eta Frailearen malda jeitsi ondoren Panticosako "Casa de Piedra" aterpean bukatuko dugu. (12,2km)

Denera, 28km-tako ibilaldi zirkular ederra.

Gorriz, lehen eguna. Urdinez, bigarrena.
DESKRIBAPENA

"Casa de Piedra" aterpea, 1636m. Aparkalekuan kotxea ahal izan dugun lekuan utzi eta mendiko traste guztiak bizkarrean jarrita ibiltzeari ekin diogu. Izugarrizko jendetza aurkitu dugu bertan, gaur Bachimañako aterpearen irekiera eguna da eta bertaratu direnak 400 bat pertsona omen dira. Gure lehen helburua, Beheko Bachimaña urtegira iristea da. Horretarako aterpearen atzetik irteten den GR-11 bidea jarraitu behar dugu.

"Casa de Piedra" atzetik doa bidea goruntz
Hemen hasten da gure gaurko bidea
Bideak ez du galbiderik
Goruntz, beti goruntz
Bidean zehar ur-jauzi ugari ditugu
Beste ur-jauzi bat
Leku benetan da bikaina
Frailearen aldapa. Badu bai, bere xarma.
Bachimañako aterpea. Leku zoragarria. 
Lola mokadutxoa jaten
Pantxorekin deskantsuan
Beheko Bachimaña ibona, 2205m. Bertatik GR-11 jarraitu behar dugu bide ezberdinak adierazten dizkigun zutabe bat ikusi arte. GR-11 (Ibon Urdinetara doana) ezkerretara utzi beharra daukagu eta eskubirantz abiatu Marcadau edo Panticosako gainera. Bidean zehar Bramatueroko ibonak, sarrioak,  eta tontor asko ikus ditzakegu.

Goiko Bramatuero ibona
Aurrez aurre, Gran Facha
Bidea ongi hartzea garrantzitsua da
Guk eskubira hartu behar dugu
Infernuak, zoragarria 
Pantxo, euliak ehizatzen
Bramatuerako ibona
Goiko Bachimaña. Hortik gatoz 
Pecicoko ibona eta atzean Gran Facha mendia
Sarrioa gure bidea zaintzen
Marcadau edo Panticosako gaina, 2541m. Wallon aterpera doan bidea jarraitu behar dugu, 2340metrotara iritsi arte. Orduan, ezkerrerantz irteten den bidezidor bat hartu behar baitugu, bere amaieran Wallon aterpetik Gran Fachako gainera doan bidearekin bat egingo dugularik. Egia esan zati honetan bidea jarraitzea ez zaigu batere erraza egin. Bidea ez dago oso ongi markatua eta senak lagunduta egin behar da aurrera harri blokez osatutako laberinto batean. Hoberena ahalik eta azkarren Wallon-dik gora datorren bidearen bat egitea da. 

Marcadauko gainetik beheruntz eginiko bidea
Jarraituriko bidea, Wallon-dik gorako bidearekin bat egitean
Vignemale mendia
Gran Fachako azken kresterioa
Gran Fachako gaina, 2668m. Egia esan hemendik Respomusora doan bidea izugarri gustatu zitzaidan. Benetan ederra da jarraitu beharreko bidea, eta momentu oro, zelai orlegi, ibon urdin, edo harri grisen koloreak besarkatzen zaitu. Aurrez aurre, Frondiellak eta Balaitus ikusi daitezke, baita momenturen batean, Cristales mendia.

Respomusoko bailara
Zearkatu beharreko elurtegi bakarra
Beherako bidea elurtegirarte 
Lola beheruntz, neka neka eginda
Frondiellak, eguzkia mendiaren atzean sartzen ari delarik 
Campoplanoko iboneko panoa
Campoplanoko ibona, 1660m. Denda hementxe jarri genuen, leku ederra benetan. Nahiz eta gaueko ordu txikitan konturatuko garen asto ugari daude zelai hontan, bakoitza bere zintzarri eta guzti.

Hurrengo egunean esnatu bezain pronto, Frondiellek eman ziguten egun ona.

Frondiellak
Gaurko egunean, Respomusotik Panticosako "Casa de Piedra" aterpera doan GR-11 bidea hartu behar dugu. Lehenik, Llena Cantaleko ibonera iritsiko gara eta ondoren harritxintxarrezko malda batetik, Tebarrayko gainera iritsiko gara.

Llena Cantaleko ibonerako igoera. Aurrean Tebarray mendia 
Llena Cantaleko ibonetik Tebarraiko gainera doan igoera
Tebarrayko gaina, 2782m. Gain honetatik, paisai ederra ikusiko dugu. Alde batetik Infernu mendia, bestetik Partacuako mendizerra Tebarrayko ibonean isladatua. Bertatik, Infernuko gainera joan beharko gara, horretarako ezkerretara dugun malda zearkatu beharko dugu, hamar minutu besterik ez direlarik.

Infernu mendia eta ezkerretan Infernuko gaina
Partacuako mendizerra Tebarrayko ibonean islatua
Infernuko gaina, 2721m. Jende ugari aurkitu dugu bertan. Hemendik beheruntz doan bideak, edozein mendizale poztu dezake. Lehenik eta behin, Infernuko glaziarra; ondoren, Ibon Urdinak (goikoa eta behekoa) eta azkenik ur jauzi eder bat, Goiko Bachimaña ibonera iritsi baino lehen.

Infernuko gainetik daukagun paisaia eta beherako bidea
Infernuko glaziarra (hurrengo bisitaraino iraungo al du?)
Infernuko gainetik beheruntz zearkatu beharreko elurtegia
Goiko Ibon Urdina 
Beheko Ibon Urdina eta urrutian Goiko Bachimaña ibona

Ur jauzi ederra
Goiko Bachimaña ibonera iristen
Atzoko bide-zutabea
Hemendik aurrera, atzo honaino eginiko bidea desegitea besterik etzaigu geratzen. Bachimaña ibona igaro, aterpetik pasa, Frailearen aldapa jeitsi eta Panticosara bideratuko gara.

Dagoeneko, Pantxok bere oinetako kuxintxoak ("almohadillak") guztiz txikituak zituen, eta errenka dabil azken ordu erdian. Bazkaldu dugunean lehen sorosmenak eman dizkiogu, eta konturatu gara oinak haragi bizitan dituela. Beraz, ez dut bitan zalantzarik egin eta azkenengo ordu ta erdian txakurra bizkar gainean eraman beharra izango dut.

Pantxo bizkarrean eramaten
Bachimañako aterpea, benetan leku zoragarrian
Panticosako bainuetxea
Azken pausuak
"Casa de Piedra" aterpea, 1636m. Kanpoko mahai batean eseri, botak kendu eta limoidun garagardo bikain bat hartu dugu gure mendi asteburua bukatzeko modu hoberena baita.

Pantxok beste bizpairu egun pasa ditu errenka, baina pixkanaka pasatzen hasi zaio. Hona hemen nola sendatu behar izan genuen etxera iritsi bezain laster.

Pantxo hartatu ostean
Mendi asteburu ederra, konpainia ezin hobearekin. Ea laster errepikatzen dugun!